“Di mia e di tia” di Maria Cristina Adragna

DI MIA E DI TIA

Di mia e di tia
m’arristau lu pinseri,
‘u ciavuru d’aeri,
lu scantu e la fuddìa.

N’ avìamu d’alligria
chi ni giuvava, pi cuscienza,
ma spissu, la pacenza
ni sarva o n’abbannuna.

Tu eri a me furtuna,
la vita e lu dammaggiu,
na primula di maggiu,
un ventu chi quarìa.

Lu sa’? Di mia e di tia
p’un pezzu ni parraru,
ma po’ si lu scurdaru,
li vuci vannu e bennu.

E iu pirdìa lu sennu
picchì t’avia a quartiari
di tutti di majari
chi ghiettanu vilenu.

Passau un sulu trenu,
sicura lu pigghiasti,
si tu m’abbannunasti
iu ti lassavi iri.

Mi trovu assà a patìri
pi chiddu c’a nun fici
pi fariti felici,
rinnènnuti regina.

E giustu stamatina
pinsai di mia e di tia,
tu fusti la poesia
chi ormai ‘un scrivu chiù. 

Maria Cristina Adragna

DI ME E DI TE

Di me e di te è rimasto il pensiero, il profumo di ieri, la paura e la follia. Ne avevamo d’allegria che giovava, in tutta onestà, ma spesso la pazienza ci salva o ci abbandona. Tu eri la mia fortuna, la vita, il danno, una primula di maggio, un vento che riscalda. Lo sai? Di me e di te per un pezzo ne hanno parlato, poi l’hanno dimenticato, le voci vanno e vengono. Ed io perdevo la ragione perché ti dovevo difendere da tutte quelle fattucchiere che gettano veleno. È passato un solo treno, lo hai preso sicura di te, se tu mi hai abbandonato io ti ho lasciata andare. Mi trovo a patire molto per ciò che non ho fatto per renderti felice, facendoti regina. E giusto stamattina ho pensato di me e di te, sei stata la poesia che ormai non scrivo più.

Clicca sul link qui sotto per leggere il mio articolo precedente: